बंगालच्या उपसागरातून येणाऱ्या बाष्पयुक्त वाऱ्यांमुळे पोषक स्थिती; आज दुपारनंतर अनेक जिल्ह्यांत ढगांच्या गडगडाटासह सरींची शक्यता.
विशेष प्रतिनिधी, पुणे, दि. १५ ऑक्टोबर:
राज्यातून नैऋत्य मोसमी पावसाने (मान्सून) जवळपास माघार घेतली असली तरी, पुन्हा एकदा पावसाचे पुनरागमन होण्याची शक्यता निर्माण झाली आहे. मान्सूनचा परतीचा प्रवास आता अंतिम टप्प्यात असून, केवळ गडचिरोलीच्या दक्षिण भागातून त्याची माघार बाकी आहे. मात्र, त्याच वेळी बंगालच्या उपसागरावरून येणाऱ्या पूर्वेकडील बाष्पयुक्त वाऱ्यांमुळे राज्यात पावसासाठी पोषक स्थिती तयार होत आहे. यामुळे आज (दि. १५) दुपारनंतर विजांच्या कडकडाटासह जोरदार पावसाचा अंदाज वर्तवला आहे.
या जिल्ह्यांना पावसाचा इशारा
येत्या २४ तासांत राज्याच्या दक्षिण भागात पावसाचा जोर अधिक राहण्याची शक्यता आहे. सातारा, सांगली, कोल्हापूर, रत्नागिरी आणि सिंधुदुर्ग या जिल्ह्यांमध्ये दुपारनंतर काही ठिकाणी ढगांच्या गडगडाटासह, सोसाट्याचा वारा आणि मध्यम ते जोरदार पावसाचा अंदाज आहे.
त्यानंतर अहिल्यानगर, बीड, धाराशिव, लातूर, नांदेड, परभणी, हिंगोली, यवतमाळ, चंद्रपूर, गडचिरोली, वर्धा, अमरावती, अकोला, बुलढाणा आणि वाशिम या जिल्ह्यांमध्ये हलका ते मध्यम, तर काही ठिकाणी विजांच्या कडकडाटासह पाऊस बरसण्याची शक्यता वर्तवण्यात आली आहे.
पुणे, मुंबई, नाशिकमध्ये काय स्थिती?
पुणे, ठाणे, मुंबई, रायगड आणि नाशिक या जिल्ह्यांमध्ये विशेष पावसाची शक्यता नाही. मात्र, स्थानिक पातळीवर ढगांची निर्मिती झाल्यास हलक्या सरी कोसळू शकतात. उर्वरित जिल्ह्यांमध्ये हवामान कोरडे राहण्याचा अंदाज आहे.
पावसाच्या पुनरागमनाचे कारण काय?
हवामान तज्ज्ञांच्या मते, बंगालच्या उपसागरावरून येणारे पूर्वेकडील वारे महाराष्ट्राकडे मोठ्या प्रमाणात बाष्प घेऊन येत आहेत. यामुळे वातावरणातील आर्द्रता वाढली असून, ढगनिर्मितीसाठी अत्यंत अनुकूल परिस्थिती निर्माण झाली आहे. याचाच परिणाम म्हणून राज्यात, विशेषतः दक्षिण भागात, दुपारनंतर स्थानिक पातळीवर ढग जमा होऊन पावसाच्या सरी बरसण्याची शक्यता आहे. शेतकऱ्यांनी शेतीकामांचे नियोजन करताना हवामानाचा अंदाज घ्यावा, असे आवाहन करण्यात आले आहे.