चाळीसगाव: राज्यातील शेतकऱ्यांसाठी, विशेषतः सोयाबीन उत्पादकांसाठी, हवामान अभ्यासक पंजाबराव डख यांनी एक अत्यंत दिलासादायक अंदाज वर्तवला आहे. आज, ९ ऑक्टोबर २०२५ रोजी चाळीसगाव घाटातून प्रवास करत असताना त्यांनी दिलेल्या माहितीनुसार, राज्यात १६ ऑक्टोबरपर्यंत पावसाने उघडीप दिली असून, हवामान कोरडे राहणार आहे. यामुळे शेतकऱ्यांना सोयाबीन काढणी आणि रब्बीच्या पेरणीची तयारी करण्यासाठी पोषक वातावरण मिळाले आहे.
१६ ऑक्टोबरपर्यंत मोठा पाऊस नाही
डख यांनी स्पष्ट केले की, ९ ऑक्टोबर ते १६ ऑक्टोबर या कालावधीत राज्यात मोठ्या पावसाची शक्यता नाही. त्यामुळे शेतकऱ्यांनी कोणतीही चिंता न करता आपल्या सोयाबीन, उडीद आणि इतर काढणीला आलेल्या पिकांची सवंगणी करून घ्यावी. मात्र, या काळात सकाळी धुई आणि धुके पडण्याची शक्यता असल्याने, काढणी केलेले पीक रात्रीच्या वेळी झाकून ठेवण्याचा सल्ला त्यांनी दिला आहे.
१६-१७ ऑक्टोबरनंतर तुरळक पावसाची शक्यता
१६ आणि १७ ऑक्टोबरच्या सुमारास राज्यात पुन्हा पावसासाठी पोषक वातावरण तयार होऊ शकते, असेही डख यांनी सांगितले. आंध्र प्रदेश, तामिळनाडू, कर्नाटक, तेलंगणा या दक्षिणेकडील राज्यांमध्ये पाऊस पडणार असल्याने त्याचा परिणाम महाराष्ट्राच्या सीमावर्ती जिल्ह्यांवर दिसून येईल. यामध्ये यवतमाळ, नांदेड, लातूर, हिंगोली, परभणी, धाराशिव, सोलापूर, सांगली, सातारा या जिल्ह्यांमध्ये तुरळक ठिकाणी हलका पाऊस पडू शकतो. मात्र, हा पाऊस सर्वदूर नसणार असल्याने शेतकऱ्यांनी घाबरून जाऊ नये, असे आवाहन त्यांनी केले आहे.
दिवाळीत पाऊस, नोव्हेंबरपासून थंडी
यंदा दिवाळीत पाऊस पडणार असल्याचा अंदाजही डख यांनी वर्तवला आहे. मात्र, २ नोव्हेंबरनंतर राज्यातून पाऊस पूर्णपणे निघून जाईल आणि थंडीला सुरुवात होईल. “२ नोव्हेंबरनंतर महाराष्ट्रातील सगळे शेतकरी आणि जनता स्वेटर घातलेले दिसतील,” असे भाकीत त्यांनी केले आहे.
एकंदरीत, सध्या पावसाने मोठी उघडीप दिली असल्याने शेतकऱ्यांनी या संधीचा पुरेपूर फायदा घेऊन आपली रखडलेली शेतीची कामे वेळेत पूर्ण करावीत, असे आवाहन पंजाबराव डख यांनी केले आहे.